Esanetan
Hamaika ekimen kultural ospatzen dira gurean urtean zehar. Badira zinemarekin, musikarekin zein antzerkiaren lotura dutenak, besteak beste. Goizez zein gauez, neguan zein udan, erdigunean zein auzoetan.
Hona hemen gurean ospatzen diren programa kultural aipagarrienak:
ARTE ESZENIKOAK
ACT
XVII. ESZENA BERRITZAILEEN NAZIOARTEKO JAIALDIA
ACT Jaialdiak ikuslegoari arte bizien esperientzia eskainiko dio, formatu laburraren alde eginez, gehienez 30 minutuko dantza, zirku, performance, testu- antzerki eta abarreko 3 edo 4 piezako saioekin. Programazioa arloko nazioarteko adituen hitzaldi eta eurek gidatutako tailerrekin osatuko da. Bertan nazioarteko programatzaileak, artistak eta ikusleak elkartu egin ahal dira erakutsitako lanei buruz hitz egiteko.
BILBOKO KALEALDIA
KALEKO ANTZERKIEN NAZIOARTEKO JAIALDIA
Gure pertsonaiek binetetatik kalera jauzi egingo dute, lan eszenikoen bitartez ikusle guztiek goza dezaten. Bilboko Udalak antolatzen duen kaleko arteen erakusketa honek, Alde Zaharrean eta Casilda Iturrizar Parkearen inguruan, kaleko arte eszenikoen arloan nazioarteko eta Estatuko talde nabarmenenetako batzuen proposamen berritzaileenak biltzen ditu, bertako taldeen azken lanekin batera, zirku, dantza, musika, clown, kalejira eta abarreko emanaldiekin.
BILBAO ANTZERKI DANTZA (BAD)
BILBOKO ANTZERKI ETA DANTZA GARAIKIDEAREN JAIALDIA
Behin baino gehiagotan “OH MY GOD” hasperena eragingo duen jaialdi honetan, gaur egungo eszenako abangoardistena eta berritzaileena erakutsiko da hiriko zenbait gunetan egingo diren nazioarteko, nazioko eta bertako antzerki eta dantza taldeen ikuskizunen estreinaldien bidez. Era berean, topaketarako, prestakuntzarako eta gogoeta eszenikorako elkargunea da, mahai inguruen, hitzaldien eta tailerren bidez.
DANTZALDIA JAIALDIA
Udazkenean hiri osora eta bere gune nabarmenenetara hedatzen den nazioarteko erakustaldia.
LEKUZ LEKU JAIALDIA
Dantza pieza laburren nazioarteko jaialdia.
IKUSMEN-ARTEAK
OPEN ESPAZIOA
Zorrotzaurren kokatua, Artiach lantegi zaharrean, kultura garaikidea, teknologia eta gizarte gaien arteko elkargunean lan egiten du. Sorkuntza eta fabrikazio digitalerako zentro bat du, Fab Lab Bilbao, Massachussets Institute of Technology-ren Center of Bits and Atoms-eko Fab Lab Laborategien Sareko kidea dena.
Bere proiektuen artean hauek daude: Open Your Ganbara, bigarren eskuko gauzen azoka (hilabetearen 2. larunbatean); Open Your Sormena, arte, diseinu eta sorkuntza talentu gazteen merkatua; eta Maker Faire Bilbao Teknologia Sortzaileen Nazioarteko Jaialdia, azaroaren 1etik 3ra egingo dena, hitzaldiekin, tailerrekin, parte-hartzeekin eta standekin. Hala da, galdu ezin duzun abangoardia kultural bilbotarraren BOOMA.
BILBAO ART & FASHION BIAAF
18 eta 35 urte arteko mundu osoko diseinatzaile berriei zuzendutako moda-diseinu lehiaketa. 60 herrialde baino gehiagotako eta moda-diseinuko nazioarteko eskola onenetako talentu gaztea. Lehiaketara aurkezten diren lan guztiak artearen munduarekin zuzenean lotuta edo horretan iradokita egon behar dute (estanpatuak, moldeak, xehetasunak,…) eta artearen munduari aurre egiteko diseinatzaile bakoitzak dituen ikuspuntu ezberdinak erakustea suposatzen duen kulturarteko aberastea bilatzen da. Koloreen nahasketak, grabatuek eta estanpatuek fashion munduko begiluze guztientzat BOOM ikusgarria sortuko duen gunea.
BLV-ART
Adierazpen artistiko herritarrenei lotutako udal programa, Bilbo Zaharra, San Frantzisko eta Zabala auzoetako errehabilitaziorako trakzio-elementu gisa kulturaren alde apustu egiten duen Plan Bereziaren parte dena. Zinema, performanceak, antzerkia, erakusketak eta bisita gidatuak inguruko gune sortzaileetara, hormairudi artistikoak, musika eta beste proposamen berritzaile batzuk.
ARTESHOP
BilbaoArte Fundazioarekin eta EHUko Arte Ederren Fakultatearekin, Bilbao Ekintzak programa honen 9. edizioa antolatuko du, merkataritza eta arte jardueren arteko sinergia aprobetxatuz, merkataritzan sormena sustatuz, adierazpen artistikorako ez ohiko eremua sortuz eta kolore distiratsu eta fluoreszentez beteriko erosketa esperientzia marraztuz. Udaleko saltegiek Arte Ederren Fakultateko ikasleek beren-beregi egindako artelanak erakutsiko dituzte. Halaber, BilbaoArte Fundazioko artistek euren interbentzio artistikoak egingo dituzte Bilboko toki esanguratsuetan.
BILBOARGAZKI
Euskal Herriko Argazkilarien Elkarteen Federazioak antolatua, BilboArgazkiren hamahirugarren edizioak Hiria argazkigintzaren nazioarteko hiriburu bihurtuko du, zenbait lekutan eta egile espainiar eta atzerritarren 8 erakusketekin, 6 hitzaldiekin eta 4 argazki tailerrekin, bat umeei bereziki zuzendua eta Talentu Gaztearen Lehiaketa.
BILBAO BIZKAIA DWEEK
Industria sortzaileen munduaren sustapenean oinarritutako ekitaldia (arkitektura, artisautza, ikusentzunezkoak, komunikazioa, eduki digitalak, diseinua, interiorismoa, moda eta bideo-jokoak), Bilbo eta Bizkaiko zenbait tokitan 40 jarduera baino gehiago batzen dituena, profesionalei zein hiritarrei zuzenduak.
LETRAK ETA EZAGUTZA JENDARTERATZEA
URBANBAT JAIALDIA
Bizitzak molde desberdinak ditu eta Bilbon hirigintza eta gizarteberrikuntzari buruz ospatzen den kultura jaialdiak badaki. Hiria, hiritartasuna, artea, kultura, gizartea eta lurraldearen arteko harremana aztertzen duen ekitaldia edo topaketa da.
EZTABAIDAK LITERATURAREKIN
Ospe handiko idazleekin hilero egiten diren literatura-topaketak dira, intereseko gai baten gainean. Moderatzaile edo aurkezle kualifikatu bat aritzen da haietan.
JA!
Kultur ekitaldi paregabea umorearen garrantzia azpimarratzea nahi duena oro har artean eta bereziki literaturan. Ja! jaialdiak honako hau aurkezten du jardueren programa luzea, hausnarketarako adina leku, mahai inguruak, elkarrizketak, lehiaketak, erakusketak… besteak beste.
IDEIAK MARTXAN
Bilboko Gazteria eta Kirol alorrak sustatutako deialdia da. Gazteek udal programazioan egindako
egindako proiektuen garapena
gazteek
udal programazioa
gazteria. Hauek har dezakete parte:
pertsona gazteak, banaka
edo 14 eta 35 urte bitarteko taldean
adina
KULTURA ETA PENTSAMENDUARI BURUZKO ZIKLOA
Gaurkotasuneko gai bati buruzko hitzaldiak, maiatzeko astelehenetan.
EMAKUMEEK ZIENTZIA EGITEN DUTE
Programa honetan balioa ematen zaio emakumeek zientziari egiten dioten ekarpenari. Azaroko ostegunetan izango da.
IKUS-ENTZUNEZKOA, MULTIMEDIA ETA TEKNOLOGIA BERRIAK
ART HOUSE ZINEMA
BILBAO ARTE FUNDAZIOA
Tiretako irudiak ikus-entzunezko piezak izatera igarotzen dira. Urtean zehar, BilbaoArte udal Fundazioak zenbait genero eta egileren zinemazikloak eta dokumentalenak antolatzen ditu ere egoitzan, baita hitzaldiak,mintegiak eta topaketak ere.
BIDEOTIK, IKUS-ENTZUNEZKO SORKUNTZA GARAIKIDEA
Bideosorkuntzari zuzendutako programa, ikus-entzunezko beste narratiba batzuei arreta emateko helburua duena, hau da, bideo tresna bezala erabiltzeko beste modu batzuei, istorioak kontatzeko, narratzeko, etab. Sortzaileei ere gune bat eskaintzen zaie euren ikusentzunezko sorkuntza garaikideak aurkezteko, azaltzeko eta hauei buruz publikoarekin hitz egiteko. Horrez gain, Atrioko pantaila ikus-entzunezko lanak ezagutzera emateko tresna bezala gehitzen da.
X GIZAZINEA
Gizazinea programak balioetan eta giza eskubideetan oinarritutako hezkuntza eta arte eta ikus-entzunezko sorkuntza uztartu nahi ditu, gaur egungo gai batzuetara hurbiltzeko, hala nola, emakumeen berdintasunaren aldeko borroka, aniztasun funtzionala, askatasun-gabetzea, indarkeria instituzionala edo babesa, zinearen, arte plastikoen, musikaren edo literaturaren bidez, hausnarketa, solasaldia eta tolerantzia sustatzeko.
BILBAO SERIESLAND
Euskal Herriko Sail Digitalen Nazioarteko Jaialdia. Eduki independiente onenerako eta mundu osotik datozen euren sortzaileentzako topagunea. Etxean eduki nahi izango dituzun istorio sinestezinen bilduma.
ANIME BILBAO FAB IV. JAIALDIA
Anime komiki eta kultura japoniar zaleek ere beren gozamenerako gunea izango dute Guggenheim Museoaren Auditorioan. 2019an bere hirugarren edizioa ospatzen du Bilbon animazio jaialdi honek. Arte-adierazpen garaikide interesgarrienetako batekin topo egiteko aukera da, eta aurreko edizioetan honako egile hauen lana eskaini du: Mamoru Oshii, Satoshi Kon, Mamoru Hosoda, Isao Takahata, Masaaki Yuasa, Makoto Shinkai, … Irailean FABek Bilboraino hurbilduko ditu Japonian ekoiztutako animeko azken filmak. Guggenheim Museoaren Auditorioak jaialdi hau hartuko du eta honetan zehar nazioarteko onespena duten zinegileen lanak ikusi ahal izango dira eta, animazioa, Japoniako industria kultural arrakastatsuenetako batentzat lan egiten duten sortzaile berrien proposamenak aurkitu.
ZINEMAKUMEAK GARA!
Industria zinematografikoa ez litzateke gaur dena izango emakumearen ekarpen garrantzitsua kenduta. Hau azpimarratzeko, emakumeek zuzendutako zinemaren erakusketa egingo da, Hirira urtero gai komun desberdin baten inguruko film labur eta luzeen sorta zaindua, mahai inguruak eta hitzaldiak dakarrena.
ANIMAKOM FEST 2020
BILBOKO ANIMAZIO ZINEMAREN NAZIOARTEKO JAIALDIA
Marrazki bizidunen arteko ibilbide sinestezina proposatzen dizugu. Hirugarren edizio honetan, lehiaketakoak diren bi sailekin (profesionala eta ikasleena) eta Animakom Award sariaren emanaldiarekin, azken hau animazioaren arloko zuzendari edo profesional bati bere ibilbide osoari aitorpena egite aldera. Horrez gain, euskal film laburren eguna egingo da, emakumeek zuzendutako animazioko film labur onenen saio bat, 2018ko Annecyko Jaialdiko onenarekin bi saio, umeentzako saio bat, Krazykom film labur ausarten gaueko proiekzioa, Zinebi Women saio bat eta sail panoramikoa, jaialdiaren irabazleen zerrendaren saio batekin amaituz.
FANT 26
BILBOKO ZINEMA FANTASTIKOAREN XXVI. JAIALDIA
Zinemaren historia lehenago gure komikietan bizi izan diren pertsonaia askok osatzen du. Bineta irudikatu bakoitzean hunkitu gintuzten izaki fantastikoak, gaur egun Fant jaialdiaren ikus-entzunezko munduan ikusteko zortea duguna. Bilboko Udalak antolatuta, fantasiazko generoaren azken berrikuntzak erakusten ditu Atal Ofizialean eta Ikuspegi FANTastikoa Sailean. Eta hori osatzeko, film klasikoak ematen dira, Fant Maisuei omenaldia egiten zaie, generoan erreferentziazkoak diren dokumentalak, eta haurrentzako saioak eta film laburren saioak egiten dira. Gainera, Fantrobia saria emango zaio fantasiazko zineman gorantz doan figura bati eta epaimahaiaren ustez onenak diren lanei ere sariak emango zaizkie. Film laburren kasuan, ikusentzuleek ere saritzen dute lan bat.
25. urteurrenean aurreko hilabeteetan kultura-ekitaldi ugari egingo dira: kontzertuak, topaketak, erakusketak, proiekzio berezien zikloak, etab.
ZINEBI 62
BILBOKO NAZIOARTEKO DOKUMENTAL ETA LABURMETRAIA ZINEMALDIA
60 urteko ibilbidearekin, Zinebi erreferentziazkoa egin da dokumentalen eta film laburren zinemaren barruan. Udalak antolatuta eta (FIAPF) Filmen Ekoizleen Elkarteen Nazioarteko Federazioaren aitorpena duela, zenbait sari ematen dituen Sail Ofiziala dauka, besteak beste, Ohorezko bi Mikeldi sari eta Jaialdiko Sari Handia.
Bestalde, opera prima film laburrei eskainitako nazioarteko lehiaketa, Zinebi First Film-Ziff, aurkezten du. Eta hurrengo hauek ere bai: Beautiful Docs, nazioarteko film luze dokumentalen erakusketa; Bertoko Begiradak, oraintsu ekoitzitako euskal film luzeei eskainitako saila; Zinebindustry, Euskal Herrian Eta Bilbon film luze dokumentalen proiektuak sustatzeko topaketa; Zinebitxiki, ume eta gazteentzako zinema; eta atzera begirakoak, gaikako ikuspegiak, omenaldiak, profesionalen arteko topaketak, prestakuntza tailerrak, hitzaldiak, festak, performanceak eta abar.
Edizio bakoitzaren aurreko astean, Zinebik Zinebi-Express antolatzen du, 48 ordutan asmatu, idatzi, ekoiztu, filmatu eta muntatu diren film laburren lehiaketa, EHUko Gizarte eta Komunikazio Zientzien eta Arte Ederren Fakultateen, eta Bilbo eta Bizkaiko ikus-entzunezko prestakuntzako zentro publiko eta pribatuen laguntzarekin.
V HOMELESS FILM FESTIVAL
Bizitegik, 2016. urteaz geroztik, Homeless Film Festival antolatzen du Bilbon, eta aurten, lehen aldiz, baita Donostian ere, gizarteratzeari buruzko sentsibilizazio-jardunaldiak sortuz, zinemaren eta antzerkiaren bidez.
Bizitegiko Taldea Bizkaiko gizartetik baztertzeko arriskuan edo egoeran dauden pertsonak gizarteratzen lan egiten ari da, haien bizi-baldintzak hobetzera bideratutako esku-hartze prozesuen bidez, eta gizarte bidezkoago bat eraikitzeko kontzientzia sortzea ahalbidetzen duten sentsibilizazio- eta salaketa-ekintzen bidez.
BILBAO MENDI FILM FESTIVAL
MENDIKO ZINEMARI BURUZKO BILBOKO NAZIOARTEKO JAIALDIA
Hain muturreko kirolak daude, zeren kolore guztietako pop koadroak bezala jartzen gaituzten. Jaialdi honek, International Alliance for Mountain Film elkarteko kidea denak, beste urte batez urte osoan mundu osoan ekoiztutako mendiko, abenturazko eta muturreko kiroletako zinemaren nabarmenena hurbilduko digu. Eskola magistralek, erakusketek eta errealizadoreekin, mendizaleekin eta alpinistekin egindako topaketek lehen mailako programazioa osatuko dute. Gainera, mendiaren kulturaren balioak transmititu eta hauei ekarpena egiteagatik mundu mailan erreferentziazkoak diren pertsonekin elkartzeko eta biltzeko tokia ere bada.
8º TRACKING BILBAO
Zer da POPago interneten ikusten duguna baino? Interneteko gauzen jaialdia da, Caosticak eta Borja Crespok antolatua, kultura digitalaren nazio eta nazioarteko garrantzitsuena elkartzen duena. Prestakuntzarako, hausnarketarako eta dibertsiorako jardunaldiak, sarearen bidez bizimodua ateratzen ikasi duten artistak elkartzen dituztenak, ikastaroekin, tailerrekin, eskola magistralekin, hitzaldiekin, topaketekin, ikuskizunekin eta kontzertuekin.
MUSIKA ETA SOINU-ARTEA
MUSIKA-MÚSICA
Bilbao 700 Fundazioak Bilboko musika klasikoko jaialdi honen beste edizio bat antolatuko du Euskalduna Jauregian. London-New York gaiaren pean, Hiria ekitaldi jendetsu honen nazioarteko egoitza izango da, iaz 30.000 lagunen bertaratzea izan zuena.
BILBOLOOP JAIALDIA
Hiritarrei kultura hurbildu nahian, jaialdi honek urte bakoitzeko talde hasiberri onenak ekartzen ditu Bilbora, bertokoak, Estatukoak zein nazioartekoak, Kafe Antzokian kontzertuak emanez. Horrez gain, aldi berean Bilboko zenbait lokaletan doako jarduera batzuk eskaintzen ditu.
KAFE ANTZOKIA
Urte hauetako jardunbidearen ondorioz erreferentzialtasun helburu horiek bete dira, Kafe Antzokia Bilboko zein kanpoko euskaldunontzat topagune ezagun eta irekia bilakatu baita. Bere jarduerak asko dira, egun eta orduaren arabera.
Zuzeneko musikari dagokionez, Bilboko eszenatoki nagusia da Kafe Antzokia. Euskal musikari gehienek jo dute Kafe Antzokian, baita atzerriko ehunka talde eta bakarlari ezagun ere. Bilbotik kanpo ezaguna da Kafe Antzokia, bere izaera bakana dela eta, artistek biziki estimatzen dute berton jotzea eta zaleak urrundik etorri ohi dira, bertoko programazio aberatsak erakarrita.
ASTE NAGUSIKO TOKIKO POP-ROCK ERAKUSTALDIA BILBOROCK-EN
Erakustaldiak Bizkaiko musikaren topagunea izaten jarraitzeko helburua du. Izan ere, 500 talde eta bakarlari baino gehiago igo dira erakustaldi honen oholtzara; Platero y tú, We Are Standard, Zea Mays, Idi Bihotz edota Porco Bravo, besteak beste. Kontzertuak Bilborock-en ospatzen dira Aste Nagusian zehar.
BILBAO BBK LIVE
Hiru egunez Kobetamendi marraztuta dagoen binetara lekualdatuko gara, pop-rockeko egungo talde nagusien zuzeneko kontzertu handiez gozatzeko.
Musika-ekitaldi hau Udalak sustatzen du, Last Tourrekin elkarlanean eta BBKren babesarekin, eta nazioartean hainbat aitorpen egin zaizkio.
ONDAREA ETA IDENTITATEA
LORALDIA JAIALDIAREN VI. EDIZIOA
Euskara eta euskal kulturaren inguruko jaialdia, hiritar guztiei irekia. Besteak beste, hauek izango ditu: Sarrionaindiari buruzko literatura-hitzaldia eta bere poema musikatuen kontzertua, poesia performancea, poesia-saioak musika eta bertsolaritzarekin batera, antzerki eta musika ikuskizunak, antzerki saioak, kontzertuak, kaleko eskulturak, umeentzako txotxongiloen ikuskizuna, Street Dantza tailerra, Euskal Herriko BeatBox txapelketa, hip-hop eta rap kontzertua, literatura eta musika performancea, argazkien erakusketa, proiekzioak, zinema dokumental saioa, dantza garaikideko ikuskizuna, literatura saioa bertsolaritza eta musikarekin, eta abar. Kultura eta euskara komiki tira batean batuta.
UDABERRIKO BERTSO SAIOAK
Santutxun maiatzeko larunbatetan egiten diren bertsolarien ekitaldien programa honen 35. edizioa, puntako bertsolarien partaidetzarekin. Udalak antolatuta, Santutxuko Bertso Eskolarekin elkarlanean.
BILBAO IZAN
Komiki honetatik aterako gara Hiriko auzoen historiatik paseatzeko. Bilboko ondare historikoa sustatzeko eta zabaltzeko udal programa, Hiriko auzoetan zehar egingo diren kaleko bisita gidatuen bidez, maiatzean, ekainean, uztailean eta irailean.
Gainera, Txio ta Txio sare sozialen bidez hedatutako bideoen edizioa egingo da, eta bertan pasadizoak, pertsona esanguratsuak, eginak eta Bilboko auzo desberdinetan bizitako une historikoak ezagutzera ematen dira.
BIRA
Komiki bat irakurtzeko erabiltzen den erritmo on berekoak dira gure euskal dantzen emanaldiak, kalejirak eta erromeriak. Udalak antolatzen ditu, Bizkaiko Dantzarien Biltzarrarekin elkarlanean, Salbatzaile, Gaztedi, Ondalan, Bihotz Alai, Beti Jai Alai, Ibai Arte eta Deustuko Folklore Taldeak bertoko taldeen esku. Santiago, Aita Donostia, San Pedro, Zumarraga, Arangoiti, Elorrieta, Ibarrekolanda, Deustuko Erribera, San Ignazio, Zorrotza, Areatza eta Arriagako kale-plazetan izaten dira saioak.
BASQUE FEST
BASQUE LANDS FESTIVAL
Aste Santuko jaiegunetan garatzen den euskal kulturaren eta abangoardiaren jaialdi hau Bilbao Turismok antolatzen du, eta musika, dantza, gastronomia, kirola eta zenbait kultura eta arte adierazpen batzen ditu hiriko hainbat gunetan. Erakusketak, museoetako bildumak, kaleko antzerkia, haurrentzako animazioa eta programazioa, herri-kirolen ekitaldiak, produktu eno-gastronomikoen dastaketa eta salmenta, dantzak eta kontzertuak, hauek guztiak izango dira Aste Santuko jaiegunetan irribarreak marrazteko arduradunetako batzuk.
JAIAK ETA AISIA
ASTE NAGUSIA
SEMANA GRANDE DE BILBAO
Jaialdien artean hau bai WOW dela. Era askotako jarduerez beteriko bederatzi egun, den-denak doakoak eta gehienak kanpoan. Gustu guztietarako 100 bat musikajarduera eskaintzen ditu Bilboko hainbat tokitan, egungo taldeetatik bilbainada klasikoetara; su artifizialek zerua argiztatzen dute gauero; kaleko antzerkia handientzat eta txikientzat; sukaldaritza arloko tradiziozko lehiaketak; pilota, arrauna, herri-kirolak, … Senitartekoekin edo lagunekin, egunez edo gauez, gozatzeko jarduerak dira denak. Eskaintza zabala eta anitza, eta beti lotuta honako balio hauei: aniztasuna, kalitatea, parte-hartzea, nortasuna, emakumeen eta gizonen eta euskararen presentzia orekatua. Azken batean, hiri ireki eta parte-hartzaile bateko jaietan bertokoek eta kanpotik datozenek goza dezaten.
BALEAREN DESFILEA
Desfile jendetsu hau Bilbao 700 Fundazioak antolatzen du. Bertan Baleak eta itsasoko beste pertsonaia batzuek Bilboko Kale Nagusia zeharkatuko dute Aste Nagusiko lehen igandean, bere ibilbidean fantasiadun kolore sorta utziz.
ARATUSTEAK
Desfileak, txarangak eta zalgurdiak ibiliko dira, batez ere, Alde Zaharrean eta On Diego Lopez Harokoaren Kale Nagusian, Farolinek (bere izaera “botxeroaz” harrotzen den eta bere jarduera profesionala dela-eta nabarmentzen bilbotarra) eta Zaranbolasek (bilbotar lasaia, ezerk eragiten ez bizia aldatzen ez diona) lagunduta. Jaien Batzordeak aukeratzen ditu pertsonaia hauek. Egun horietan, eta komiki batetik aterata izango balira bezalako pertsonaia paregabeez beteriko eremu baten barruan, hainbat kultura-jarduera antolatuko dira: kontzertuak, antzezlanak, umeentzako tailerrak, mozorroen lehiaketa, dantzak eta abar.
GAU ZURIA
Hiriaren urteurrenaren oroitzapena dela eta, Bilbo 700 Fundazioaren eskutik, hiria galaz jantziko da bi gauez modu berezian argiztatuz. Gau Zuria abangoardiak, argiak eta teknologiak bat eginez sortzen duten adierazpen artistikoa da. Gau magikoa, artista onenak marraztutako komiki tira baten barruan senti zaitezen.
FAIR SATURDAY
2015ean Bilbon jaiotako kultura mugimendua, kulturaren aldeko gizartearen mobilizazio jendetsua eragiteko asmoa duena. Parte hartzen duen kultura-ekitaldi bakoitzaren balioaren zati bat erakundeek eta artistek eurek aukeratutako helburu sozial batera bideratzen da. Artea eta kulturaren bidez mundu ezberdina marrazten duen eguna.
ARTE ESZENIKOAK
BILBO BARRUTI ESZENIKOA
Bilboko Udalak antolatutako zenbait ekimenek hiriko barruti guztietara hurbilduko dituzte arte eszenikoak:
• BILBOKO ZIRKUITUA: Bertako taldeek antzerki eta dantza emanaldiak egingo dituzte urtarriletik apirilera eta irailetik abendura barrutietako udaltegietan.
• UMOREZKO ANTZERKI ERAKUSTALDIA: Errekaldeko udaltegian, martxoko ostiraletan.
• ESZENA KALERA: Kaleko antzerki eta arteen zirkuitua Bilboko barruti guztietako auzoetan maiatzetik uztailera eta irailean. Barnean hartzen ditu egungo zirkuko emanaldiak, clown-enak, magiakoak, parte hartzeko jarduerak eta kaleko antzerkia edozein publikorentzat.
• XVI. MAGIA TOPAKETAK: Hogei bat mago bilduko dituztenak, bertokoak zein Estatukoak edo nazioartekoak, eta hiritar guztientzako ikuskizun sorta zabala eskainiko dutenak maiatzean zehar Otxarkoaga eta Txurdinagako kale-plazetan eta Otxarkoagako udaltegian.
• CLOWN ZORROTZA: Clownen emanaldiak maiatzeko bigarren asteburuan Zorrotzan.
• ZIRKUALDE: Zirkuko arteen jaialdia, ekaineko lehen asteburuan Errekalden burutuko dena.
BILBO MUSIKA BARRUTIA
Zenbait erakunde hiritarraren laguntzari esker ere, Udalak musika Hiriko bazter guztietara eraman ahal izango du:
• BILBO JAZZ BARRUTIA: Jazz kontzertuen zikloa udaltegietan otsailaren erdialdetik martxoaren erdialderako ostiraletan, Bilbaina Jazz Club elkartearekin elkarlanean.
• MUSIKA IKASTAROAK: Gitarra, baxua, bateria, musikainformatika eta home-studio-a eta txalaparta ikasteko, Otxarkoagan, ikasturtean zehar, Tendel-Tular elkartearekin lankidetzan.
• MUSIKA ZIKLOAK: Poltsiko Musika kontzertuen zikloa martxoan, Musika dibertigarria da kontzertu didaktikoen zikloa maiatzean eta Mila Musika Haria gitarrari eta harizko musikatresnei eskainitako zikloa azaroan, denak AbandoBarrainkuan; Xarma duen Itsasadarra flamenko topaketak Ibaiondoko barrutian irailean eta Bazter hip-hop Fest#5 emakumezkoen hiphop jaialdia San Frantziskon, Eskina Femenina taldearekin elkarlanean.
• BARRUTIAK KANTARI: Abesbatzako musika kontzertuen zikloa Bilboko barruti guztietan maiatzetik ekainera, Hiriko ia abesbatza guztien partaidetzarekin eta batez ere elizetan egingo dena.
• MUSIKAUZO: Fanfarreek, kaleko bandek, folk musikak, jazzak, marching band-ek, batukada taldeek, dantzatzeko musikako orkestrek, DJ-ek, trikitixak edo funkiak Hiriko barruti guztiak erritmoz beteko dituzte maiatzetik ekainaren amaierara.
KULTUR GABONAK
Gabonetako kultur eskaintza zabala, Udalak antolatua. Arte eszenikoetako ehun bat ekitaldi eta ikuskizun, kontzertu koralak, erakusketak, folklorea eta musika zuzenean, eta gaikako zikloak. Bilboko zortzi barruti:
• 1. BARRUTIA – DEUSTU: euskal kulturaren eta euskararen inguruko jarduerak.
• 2. BARRUTIA – CASTAÑOS: clownaren arteari eskainitako zikloa.
• 3. BARRUTIA – OTXARKOAGA: koroen emanaldiak eta adineko pertsonen elkarteetako antzerki talde amateurrak Bizkaia, Gipuzkoa eta Araba • 4. BARRUTIA – SANTUTXU: umorezko bakarrizketen zikloa.
• 5. BARRUTIA – IBAIONDO: kaleko antzerki- eta animazio-ikuskizunak.
• 6. BARRUTIA – ABANDO: ipuin-kontalarien saioak euskaraz.
• 7. BARRUTIA – ERREKALDE: zirku-ikuskizunen programazioa
garaikidea.
• 8. BARRUTIA – BASURTU: antzerki laburreko ikuskizunen zikloa.
IKUS-ENTZUNEZKO IKASTAROAK
Reflex kamera eta bideo edizioarenak, Otxarkoagan, ikasturtean zehar. Tendel-Tular elkartearekin elkarlanean.
ZINEMAKO UDA
Aire zabaleko zinema-saioak familia osoarentzat eta barruti guztietan, uztailean eta abuztuan. Genero desberdinetako ekoizpen egin berriak eskainiko dira, baita euskal, europar eta nazioarteko jatorrizko film klasiko eta arrakastatsu batzuk, errealizadoreen aurrean. Saio guztiak euskal film labur batekin hasiko dira, film luze batez jarraituta.