Bilboko Udaleko Gazteria eta Kirol Sailak Bilboko Gazte Panela 2024 jarri du abian, udal-politikak Bilboko gazteei hurbiltzeko eta udal-proiektuen diseinuan parte har dezaten ahalbidetzeko.
Bigarren edizio honetan, Bilbon bizi diren 18 eta 30 urte bitarteko 24 gaztek hartuko dute parte. Partaide horiek interesdunen artean hautatuko dira. Panelistek, eurek aukeratzen dituzten proiektuak landuko dituzte, eremu hauei lotuta:
- Jasangarritasun soziala: ekitatea, genero-berdintasuna, dibertsitatea, boluntariotza, etab.
- Ingurumen-jasangarritasuna: ekologia, ekonomia zirkularra, etab.
- Gazteentzako programazioa: musika, kultura, kirola, aisialdia, etab.
- Udal-komunikazioa: gazteen eta Bilboko Udalaren arteko elkarreragina hobetzea.
Panelak talde-saioen eta proiektuen arabera funtzionatuko du. Talde-saioak 5 zapatutan egingo dira, 10:00etatik 13:00etara, La Perrera eraikinean (Sabino Arana, 50). Proiektuka lan egiteko, paneleko kideak 4 taldetan bilduko dira, aurreinskripzioan hautatutako interesen eta gaien arabera, eta talde bakoitzak proiektu bat proposatuko du, urtean zehar garatuko duena, udal-programazioan txertatzeko helburuarekin.
Urtarrilaren 24an (eguaztena), 18:00etan, informazio-saio bat egingo dugu La Perrera eraikinean (Sabino Arana, 50), hautaketa-prozesuaz, saio kopuruaz, haien iraupenaz, ordain ekonomikoaz eta beste gai batzuez jarduteko.
Gurekin harremanetan jar zaitezke, halaber, gazteria@bilbao.eus helbide elektronikoan eta 944 20 30 98 telefono-zenbakian.
Zuen zain egongo gara!
Zer baldintza bete behar dira parte hartzeko?
- 18 eta 30 urte bitartean izatea.
- Bilbon bizitzea.
- Interesa eta motibazioa izatea.
Nola eman dezaket izena?
Izena emateko, formulario hau bete beharko duzu.
Noiz eta non izango da Gazte Panela?
Panelak talde-saioen eta proiektuen arabera funtzionatuko du.
Talde-saioak:
Gazte Panela 5 aldiz bilduko da aurten, aurrez aurre, La Perrera eraikinean (Sabino Arana, 50), 10:00etatik 13:00etara.
Talde-saioen gutxi gorabeherako egutegia:
-
- Otsailaren 24a, zapatua
- Martxoaren 16a, zapatua
- Maiatzaren 4a, zapatua
- Irailaren 21a, zapatua
- Urriaren 26a, zapatua
* Egutegia aldatu egin daiteke, panelekoak ados jarrita.
Proiektuak:
Talde bakoitzak 2024an zehar landuko duen proiektu bat proposatuko du, lantaldeak zehaztutako kronogramaren eta metodologiaren arabera.
Nolako konpentsazioa jasoko dut?
Gazte Panela osatzen duten pertsonek konpentsazio ekonomikoa eta partaidetza-ziurtagiria jasoko dituzte.
-
- 50 €, taldeko saio bakoitzean parte hartzeagatik.
- Talde bakoitzak 250 € izango ditu parte-hartzaile bakoitzeko, eta taldeak erabakiko ditu zenbateko hori banatzeko irizpideak.
- Talde bakoitzak gehienez 2.000 euroko poltsa ekonomikoa izango du, eta proiektua garatzeko erabiliko du, modu justifikatuan.
- Konpentsazio ekonomikoa azken saioa amaitu ondoren jasoko dute.
*Dagokion atxikipena aplikatuko da.
Zergatik parte hartu Gazte Panelean?
Hainbat aukera emango dizkizu:
-
- Gazteen behar eta zailtasunei ahotsa ematea eta Bilboko Udalaren erantzuna jasotzea.
- Udalaren lanei eta programei buruzko informazioa eta prestakuntza jasotzea.
- Proiektu bat garatzea, udaleko sail eskudunarekin kontrastatu ondoren, haren egokitasuna eta bideragarritasuna aztertzeko.
- Interes komunak dituzten gazteak ezagutzea.
- Hainbat gaitasun garatzea, hala nola talde-lana, denboraren kudeaketa eta komunikazio-trebetasunak.
Zer eskatuko dit Gazte Panelean parte hartzeak?
-
- • Talde-saioak prestatzea
- Proiektua lantaldeko kideekin batera garatzea.
- Taldekideekin elkarlanean aritzea.
- Komunikazio eta parte-hartze eraginkorra.
- Gazte Panela 2024ren jarduerak zure inguruan zabaltzea.
Zer gertatuko da ezin badut saio batera etorri?
Edozein kidek utzi ahal izango du Gazte Panela, bere borondatez edo Gazteria eta Kirol Sailak eskatuta, baldin eta Gazte Panelaren helburuak modu arduratsuan, egokian eta nahikoan betetzen ez dituela frogatzen badu. Kargua justifikaziorik gabe uzten badu, ez du inolako konpentsazio ekonomikorik jasotzeko eskubiderik izango.
Nola jakin aukeratu nauten?
Gazteria eta Kirol Sailak egingo du hautaketa, irizpide hauen arabera, betiere ahalik eta aniztasun handiena bilatuz: sexua, adina, jatorri kulturala, bizilekuko barrutia, ikasketa-maila, lan-jarduera, motibazioa, interes-eremua eta abar. Gazteria eta Kirol Saila harremanetan jarriko da izena eman duten pertsona guztiekin, hautaketa-prozesuaren berri emateko.
Zer gertatuko da Gazte Panela amaitzen denean?
Azken saioaren ostean, Gazteria eta Kirol Saileko langileek panelista guztiekin harremanetan jarraituko dute, Gazte Panelaren berri edo haien interesekoak izan daitezkeen proiektu, ekintza eta jardueren berri emateko.
INSKRIPZIOAK
Izena emateko, sartu Bilbao Gazte webgunean eta bete honako formulario hau.
Kontaktua:
- gazteria@bilbao.eus
- 944 20 30 98 (Astelehenetik ostiralera 9etatik 14etara. Asteazkenetan 17: 00ak arte)