Bilboko Udalak abian jarritako VillaSoundBilbao jaialdiaren lehen edizioan ehun izen-emate baino gehiago egon dira. Orotara, 16 eta 30 urte bitarteko Euskadiko eta Nafarroako 106 talde eta bakarlarik eman dute izena lehiaketaren lehenengo edizioan.

70 inskripzio Bizkaitik datoz, Gipuzkoatik 18, Nafarroatik 11 eta Arabatik 7. Taldeak osatzen dituzten 351 pertsonetatik 41 emakumeak dira; horietatik 6 emakumeek soilik osatutako taldeetan daude, eta 29 talde mistoetan. Kideen batez besteko adina 25,38 urtekoa da. Gaztelania da hizkuntza nagusia, % 43, eta atzetik, euskara eta ingelesa ia berdinduta daude, % 27 eta % 30, hurrenez hurren.

2021eko apirilean, VillaSoundBilbao jaialdiaren barruan, 4 kontzertu egingo dira Bilborock-en. Horretarako, epaimahai profesional batek izena eman duten 106 talde eta/edo bakarlarien artean 12 aukeratuko ditu. Urtarrilaren lehenengo hamabostaldian jakinaraziko dituzte aukeratutako taldeak. Kontzertu bakoitzean aukeratutako 3 talde eta talde gonbidatu bat arituko dira.

Kontzertuak doakoak eta sarrera librekoak izango dira, lekua bete arte.

Ondoren, 6 talde VSB MENTORING prestakuntza-programa batean parte hartzeko aukeratuko dituzte. Laguntza-programa hori 2021eko maiatzetik urrira bitartean garatuko da.

2021eko maiatzean, VillaSoundBilbao jaialdiaren esparruan, hainbat kontzertu programatuko dira hiriko hainbat gunetan. Gazteen musika-panoraman gora egiten ari diren 10 taldek beren sorkuntzak erakutsiko dituzte, emakumeen presentzia duten talde gazteen protagonismo sendoarekin eta musika-estilo anitzekin.

VillaSoundBilbao-ren azkenengo fasea VSB TOUR izango da, 2021ean. VSB MENTORING prestakuntzako eta lagun egiteko aldiaren ondoren, parte hartuko duten sei taldeetako bat Estatuko hiri batzuetan jotzeko aukeratuko dute. 

Jaialdiaren barruan VSB TALK jardunaldi irekiak eta doakoak ere egingo dira 2021-ean zehar, Bilborock-en. Horietan, profesionalek musikaren sektorean gazteentzat interesgarriak eta garrantzitsuak diren gaiak jorratuko dituzte.

Albiste guztiak VillaSoundBilbao-ren Instagram kontuan jarraitu ditzakezu.