Bilboko Udalak antolatutako VillaSoundBilbao jaialdiaren hirugarren edizioko epaimahaiak Gipuzkoako ITHAKA taldea hautatu du VSB TOUR bira egiteko. Lau kontzertuko bira bat da, eta 2023ko azken hiruhilekoan egingo da. Kontzertuak Bizkaian (Gernika) eta Estatuko hiru hiritan (Toledo, Zaragoza eta Kordoba) izango dira.
Emanaldi horietako bakoitzean, ITHAKA taldeak izen handiko banda batekin joko du: Belako, El Txef A eta Apartamentos Acapulco. VSB TOUR biraren helburua da hautatutako taldearen eta haren talentuaren proiekzioa sustatzea eta beste hiri batzuetako talde gazte emergente batzuekiko harremanak eta sinergiak eragitea.
Bilboko Udalak 2020ko urrian jarri zuen abian VillaSoundBilbao jaialdiaren lehen edizioa. Hirugarren edizio honetan, zenbait fase izan dira: lehenengoan, VillaSoundBilbao FEST egin zen, eta Bilborocken kontzertuak egin zituzten hasiera batean hautatutako 12 bandek; bigarrena VillaSoundBilbao MENTORING fasea izan zen, non 12 talde horietako 6 hautatu baitziren formazioa eta laguntasun profesionala jasotzeko (Julen, Nko, Lova Lois, Sofia V, Marban, eta, jakina, Ithaka); hirugarrena eta azkena, VSB TOUR bira da, eta fase honek itxiko du jaialdiaren hirugarren edizioa.
VSB TOUR 2023
Kontzertuen datak eta lekuak itxita daude:
- Azaroaren 3a, barikua –Toledo/ Círculo del arte: Belako + Ithaka
- Azaroaren 25a, zapatua – Zaragoza / Sala Z: Apartamentos Acapulco + Ithaka
- Abenduaren 10a, domeka – Kordoba / Sala Hangar: Belako + Ithaka
- Abenduaren 29a, barikua – Gernika (Astra): Ithaka + El Txef A
ITHAKA @_ithaka
Gipuzkoan sortzen ari den eszena berritik dator Ithaka; zehazki, Orio eta Zarauztik. 2004ko lau gaztek osatzen dute taldea: Josune Freire (bateria), Eneko Eizagirre (behea), Arantza Igartua (gitarra) eta Leire Olariaga (ahotsa eta teklatua). Joan den urtean (2022) Gaztea Maketa Lehiaketako ikus-entzuleen saria irabazi zuten, eta, aurten, Katapulta Tour Gipuzkoa zirkuiturako hautatu dituzte.
Taldea soinu ilun eta malenkoniatsuen itsaso batean murgildu da. Esku artean daukaten diskoan, Gipuzkoako banda alt-rock, stoner, post-punk eta post-rock generoetan mugituko da. Muse, Joy Division, Belako, Lukiek eta Wolf Alice taldeek izan dute eragina Ithakaren lehen lan luzean. Ithakaren lehen diskoaren norabidea markatu dute, batetik, bateria sendoek, baxuaren riff melodikoek, gitarrek eta, bestetik, beste batzuetan, riff gogorragoek, energiaz betetako teklatuek eta ahots malenkoniatsuek. COVIDaren osteko talde emergente honen abestiek itxaropenik gabeko gizarte bati buruz hitz egiten dute, eta haien metaforaz betetako lerroek lehen lerrora ekartzen dituzte nork bere burua bilatzeko prozesua eta arazo sozialak.