Bilboko Udalak entzuteko, lankidetzan aritzeko eta elkarrekin sortzeko jardunaldia antolatu du 18 eta 30 urte bitarteko 40 gazte ingururekin. Saio honetan, Bilbao Hiri Gaztea Udal Gazteria Plana egiteko prozesuan lantzen ari diren lehen ideiak eta proposamenak alderatuko dira, eta parte hartzeko eta Udalarekin konektatzeko espazioen diseinuak ezartzeko balioko da.

Gazteei irekitako saioa, aldez aurretik izena emanda, bihar, abenduak 11, 10:00etatik 14:00etara izango da, Euskalduna Jauregian.

Itxaso Erroteta Gazteria eta Kirol Saileko zinegotziak jardunaldian parte hartuko du, eta nabarmendu duenez, “ekimen honek bat egiten du Bilboko Udalak gazteekin garatu dituen beste batzuekin, gazteen beharrak, nahiak edo igurikimenak benetan zeintzuk diren jasoko duen plana egiteko helburuarekin”. Errotetak gogoratu du oso garrantzitsua dela gazteekin lan egitea, “haiek esan behar baitigute zer behar duten Bilboren inguruan”.

BESTE LANKIDETZA-EKINTZA BATZUK

Bilbao Hiri Gaztea Udal Gazteria Plana Udalaren eta Bilboko gazteen arteko partaidetza- eta lankidetza-prozesutzat sortu da. Plan honek Eusko Jaurlaritzaren laguntza du, eta 2022ko lehen hiruhilekoan aurkeztuko da, Gazteen Europako Urtearekin bat eginez.

Prozesua 2021eko urtarrilean hasi zen, 3 hilabetez. Aurtengo urtarriletik martxora bitartean, hainbat lan-saio egin ziren 15 eta 30 urte bitarteko 40 gazterekin baino gehiagorekin, eta hiru jardun-eremu eta 10 gai jorratu zituzten: gazte emantzipatuak (ekintzailetza, bizitza osoko prestakuntza, etxebizitza edo familia eta lana uztartzea), gazte aktiboak (aisia eta kirola), gazte konprometituak (boluntariotza, ingurumena edo feminismoa).

Aurtengo urrian, prozesuaren bigarren faseari ekin zitzaion, adin eta bizi-une desberdinetako 6 gaztek osatutako talde eragile bat sortuz, Bilboko gazteen errealitateari buruzko informazioa bideratzeko erreferentziazko taldea izan dadin. Talde honekin aldian behin lan egiten da, entzuteko eta parte hartzeko saioen bitartez.

Azaroan, beste ekintza bat hasi zen, entzute proaktibokoa kasu honetan, eta 6 gaztek kale, plaza eta parkeak zeharkatu zituzten, non gazteenak bildu ohi diren, entzuteko eta hiriarentzako hobekuntza-ideiak jasotzeko. Kasu honetan, 120 elkarrizketa baino gehiago egin ziren, eta horien ehunekoak jaso dira planean txertatzeko.

Ekintza horrekin batera, sare sozialak erabili ziren gazteengana heltzeko, hirian ezagunak diren instagramerren bitartez. Horren ondorioz, 109 iruzkin lortu eta bideoak 26.604 aldiz erreproduzitu dira.

Gazte Plana egiteko lanak, gainera, honako hauek biltzen ditu:

• Koordinazio Mahaia: besteak beste, Bilbao Hiri Gazte Planaren betetze-mailaren jarraipena eta neurketa egiteko tresna izango da.
• Gazteen Partaidetzarako Foroa: Udalak foro hau abian jarriko du, denboran iraun dezan eta gazteen errealitateari aldizka eusteko eta hurbiltzeko balio dezan.